झापा । पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले ८४ सालमा झापाको कुनै क्षेत्रबाट निर्वाचन लड्न सक्ने संकेत गर्नु भएको छ ।
आइतबार झापाको बिर्तामोडमा प्रशिक्षण तथा पार्टी प्रवेश कार्यक्रमलाई सम्बोधन गर्दै अध्यक्ष प्रचण्डले झापामा माओवादीप्रति आकर्षण बढिरहेको उल्लेख गर्दै आगामी निर्वाचनमा झापाबाट नै टक्कर दिने मनस्थिति सृजना भएको बताउनु भएको हो ।
‘जीत सत्य र न्यायको हुन्छ कि, बेइमानहरुको हुन्छ भनेर हेर्नका लागि पनि झापाबाटै टक्कर दिने सोच बनाएको छु, प्रचण्डले भन्नुभयो, तेस्रो कार्यकालमा जनताको पक्षमा सकेजति काम गर्न सकेको कारणले जनताले हामीलाई खोजिरहेका छन, शिक्षित झापाली जनताले हामीमाथि न्याय गर्छन भन्ने अपेक्षा पार्टीको छ । जनता माझ हाम्रो क्रेज बढ्न थालेपछि एकथरी प्रतिक्रियावादीहरु हामीलाई फुटाउने प्रयास गरिरहेका छन् । यो कुरा नयाँ होइन, जनयुद्ध, जनआन्दोलन, शान्ति प्रक्रिया लगायतका समयमा पनि पार्टी फुटाउने प्रयास भएका हुन्, हामीले ती सबै प्रयासहरुलाई निरर्थक बनायौं, प्रचण्डले भन्नुभयो,‘केहीदिन अघि सम्पन्न स्थायी कमिटीको बैठकले फुटवादी मानसिकतालाई सधैको लागि अन्त्य गरेको छ, हामी अहिले एकढिक्का मात्र होइन, बाटो बिराएर अन्यत्र गएका साथीहरु पनि चाँडै एकिकृत हुँदैछौ ।’
आगामी निर्वाचनबाट नेकपा माओवादी पार्टी मुलुककै ठुलो दलका रुपमाउ दाउने उहाँले बताउनुभयो । मोरङ, सुनसरी र झापाका बिभिन्न कार्यक्रममा सहभागी हुन पूर्व पुग्नु भएका प्रचण्डले ६४ सालमा माओवादीलाई मत दिएका मतदाताको जिल्ला तहका नेतालाई मनोबिज्ञान बुझ्न निर्देशन दिनु भएको छ । उहाँले ६४ मा मत दिने जनतासँग माफी माग्न, बिदेश गएका नागरिकको सूची तयार गर्न र ६४ को निर्वाचनका समयमा नाबालक रहेका जनताको मनोबिज्ञान अध्ययन गरेर उनीहरुको अपेक्षा अनुसार अगाडि बढ्न कार्यकर्तालाई निर्देशन दिनुभयो ।
जनयुद्ध गरिरहेकामा माओवादीलाई नेपाली राजनीतिको मुलधारमा कांग्रेस र एमालेले ल्याएको भनेर गलत प्रचार गरिरहेको उहाँको भनाइ छ । ‘उहाँहरुको संबैधानिक राजतन्त्र र बहुदलीय प्रजातन्त्रमा हामी सहमत भएको भए उहाँहरुले ल्याएको भन्न सकिन्थ्यो, प्रचण्डले भन्नुभयो ‘उहाँहरु नै हामीले अघि सारेको मुद्दा गणतन्त्र, धर्म निरपेक्ष राष्ट्र, समानुपातिकनिर्वाचन प्रणालीमा समाहित भएर आउनु भएको छ । उहाँहरुको अस्तित्व चै माओवादीले जोगाइदिएको हो ।’
बर्तमान प्रधानमन्त्री केपी शर्मा ओलीलाई बिश्वास गरेर गम्भीर गल्ती गरेको उहाँको भनाइ छ । ‘दुई तिहाईको सरकारको नेतृत्व गरेको समयमा संविधान च्यात्न खोज्ने ओलीलाई अब सुध्रिए कि भनेर मैले दोस्रो पटक बिश्वास गर्दै उनको समर्थनमा प्रधानमन्त्री बने, तर ओली सुध्रिनु त कता हो कता, उनीजस्तो अनैतिक, बेइमान र भ्रष्टहरुको संरक्षक अरु कोही रहेनछ ।’ प्रचण्डले केपी ओलीलाई सुधार्नु भनेको गधालाई धोएर गाई बनाउनु जस्तै भएको टिप्पणी गर्नुभयो ।
