फलैँचाको धरातलमा जन्मिएर उर्लाबारीलाई आफ्नो सिर्जनात्मक थलो बनाएका कवि उदासीलाई स्थानीय साहित्यिक मनहरुले ‘उर्लाबारीको गहना’का रूपमा सम्मान गर्दै आएका छन । नवविमोचित संग्रह ‘पानीको पर्खाल’मा जीवन, प्रकृति, समय, अनुभूति र आत्मदर्शनका विभिन्न पक्ष समेटिएका ४१ वटा कविता समावेश छन्।

भानुभक्त शिवाकोटी र जशोदा प्रसाई (शिवाकोटी) को साहिँलो सन्तानका रुपमा वि.सं. २०४१ माघ १८ गते जन्मनु भएका उदासीले २०५५ साल देखि साहित्य सिर्जनामा कलम चलाउन थाल्नु भएका हो । उपन्यास, गजल, गीत, कथा र कविता विधामा कमल चलाउँदै आउनु भएका उदासी सर्जकहरुको वायोग्राफी बनाएर प्रशारण गर्ने काममा उत्तिकै सकृय हुनुहुन्छ ।

उहाँको पहिलो कृति ‘दाइजो’ उपन्यास २०६४ मा प्रकाशित भएको थियो। ६०६७ मा गजल संग्रह दोभानपारि बाबरी र २०७० मा श्रीमती वविता घिमिरेसँगको संयुक्त कथा संग्रह ‘म हराएको साँझ’ प्रकाशित छ ।

उदासी विभिन्न साहित्यिक पत्रिकाको सम्पादन तथा रेडियोमा गजलसहितका साहित्यिक कार्यक्रम सञ्चालन गर्दै आउनु भएको छ । दीपज्योति युवा कविता प्रतियोगिता २०६६, कारितास कविता प्रतियोगिता २०६८,साहित्य कला संगम, खुल्ला कविता प्रतियोगिता २०७१ मा प्रथम बनेसँगै अन्य दर्जन बढी पुरस्कार तथा सम्मानबाट पुरस्कृत र सम्मानित हुनुभएका उदासी पछिल्लो समय व्यवसायिक गीत लेखनमा तल्लिन बन्नु भएको छ । नेपाली चलचित्रका लागि समेत गरेर उहाँका हालसम्म ५ दर्जन गीत रेकर्ड भएका छन् । रेडियो नेपालले आयोजना गरेको ०८० सालको राष्ट्रव्यापी आधुनिक गीत प्रतियोगितामा गायक गौरव दर्पणले गाएको ‘म घुम्टो उघार्छु’ बोलको गीतले प्रथम स्थान हाँसिल गरेको थियो ।

दर्जनौं चर्चित गीत तथा पुस्तकहरू लेखिसकेका उदासी पूर्वाञ्चल क्षेत्रमा लोकप्रिय सर्जक मानिन्छन्। साहित्यप्रेमीहरूको उल्लेखनीय सहभागितामा सम्पन्न यो गृहविमोचन कार्यक्रममा सहभागीहरूले युवा कविको सिर्जनात्मक यात्रामा यसले नयाँ ऊर्जा र प्रेरणा थपेको प्रतिक्रिया दिएका छन्।