उर्लाबारी, राष्ट्रिय स्वतन्त्र पार्टी (रास्वपा) उर्लाबारी नगर समितिको दोस्रो नगर सम्मेलन आज हुने भएको छ। सम्मेलनले नयाँ कार्यकालका लागि नगर नेतृत्व चयन गर्नेछ, जसमा विभिन्न पदहरूमा निर्वाचन हुने तय भएको छ।

नगर समितिको सभापतिका लागि दुई उम्मेदवार मैदानमा छन् — अघिल्लो कार्यकालका सभापति उमेशजंग थापा र अर्का प्रतिस्पर्धी कुमार दाहाल। थापाले अघिल्लो कार्यकालमा नेतृत्व सम्हालेको नगर समितिको गतिशीलता र संगठन विस्तारमा देखिएको सक्रियता तथा समर्पणका कारण उनलाई पुनः सभापतिमा निरन्तरता दिनुपर्ने आवाज बढ्दो छ। अर्कोतर्फ, कुमार दाहाल पनि संगठनप्रतिको लामो सक्रियता र अनुभवका साथ नेतृत्वदाबी लिएर अगाडि आएका छन्।

उपसभापतिका लागि इन्दिरा कार्की र निराजन बिस्वकर्मा उम्मेदवार छन् भने सचिव पदमा बद्री विक्रम सुवेदी र रिता तामाङ प्रतिस्पर्धामा छन्। सहसचिव पदमा तारा प्रसाद गौतम र इन्द्र कमल अधिकारी बीच प्रतिस्पर्धा हुँदैछ।

महिला सदस्यतर्फ दुई उम्मेदवार निर्विरोध निर्वाचित भइसकेका छन् भने अन्य सदस्य पदका लागि पनि मतदान हुने निश्चित भएको छ। नगर निर्वाचन समितिका अनुसार निर्वाचनको सम्पूर्ण तयारी अन्तिम चरणमा पुगेको छ।

सम्मेलनमा स्थानीय प्रतिनिधि, जिल्लास्तरीय नेता तथा पार्टीप्रति आकर्षित नयाँ सदस्यहरूको उल्लेखनीय उपस्थिति रहने अपेक्षा गरिएको छ। रास्वपाको स्थानीय संगठन निर्माणको क्रमलाई थप सुदृढ पार्न यस सम्मेलनलाई महत्त्वपूर्ण अवसरका रूपमा हेरिएको छ।

उम्मेदवारहरूको चर्चा र प्रतिस्पर्धा तीव्र भए पनि नेतृत्वले संगठनभित्र सहमति र एकताको सन्देश दिन प्रयासरत देखिएको छ। सम्मेलनबाट उर्लाबारी नगरभित्र रास्वपाको आगामी दिशा, कार्यदिशा र सांगठनिक नक्सा निर्धारण हुने विश्वास लिइएको छ।