बिर्तामोड । झापाको शिवसताक्षी नगरपालिका–१० माईधारका ३३ वर्षीय सरोज शर्माको योजनाबद्ध हत्या प्रकरणमा संलग्न मामा र भान्जापुर्पक्षका लागि जेल चलान भएका छन्।

झापा जिल्ला अदालतले आज २७ वर्षीय सुनिल शाह (मामा) र २३ वर्षीय राहुल साह (भान्जा)लाई थुनामा राखेर मुद्दा अघि बढाउने आदेश दिएको हो।

घटनामा संलग्न रहेको ठानिएका एक भारतीय युवक भने अझै फरार रहेको प्रहरीले जनाएको छ। प्रारम्भिक अनुसन्धान अनुसार ती भारतीय युवक सरोजको हत्यामा प्रत्यक्ष रुपमा सहभागी थिए। उनको पहिचान खुलिसकेको भएपनि पक्राउ हुन बाँकी छ।

प्रहरीका अनुसार सरोज शर्माको हत्या आकस्मिक नभई सुन लुट्ने उद्देश्यसहितको योजनाबद्ध अपराध थियो। कात्तिक ९ गते मामा–भान्जाले सरोजलाई फसाइ हत्या गरेको अनुसन्धानमा खुलेको छ।

हत्या पश्चात् अपराध लुकाउन उनीहरूले शवलाई बिरिङ खोलाको पुलमुनी गाडेका थिए। प्रमाण नष्ट गर्ने उद्देश्यले सरोज सवार गाडी समेत जलाइएको अवस्थामा फेला परेको थियो । जलेको गाडी बरामद भएपछि प्रहरी अनुसन्धानको क्रममा सरोजको सबसम्म पुगेको थियो।

गाडी जलाइएको ठाउँ र शव फेला परेसँगै प्रहरीले मोबाइल लोकेसन, संकलित सामग्री र अन्य प्रत्यक्ष प्रमाणका आधारमा सुनिल र राहुललाई पक्राउ गरी अनुसन्धान अघि बढाएको हो।