उर्लाबारी । हाम्रोमा सामुदायिक विद्यालय भन्ने बित्तिकै नाक खुम्च्याउने चलन नै छ । सामुदायिकको तुलनामा निजी विद्यालयका विद्यार्थी पढाइमा अब्बल हुन्छन् भन्ने मान्यता समाजमा स्थापित हुँदै गर्दा कतिपय सामुदायिक विद्यालयहरुले आफुलाई अब्बल सावित गरिरहेका छन् ।
मोरङ जिल्लामै नाम चलेको सामुदायिक विद्यालयमा पर्छ, राधिका माध्यमिक विद्यालय । उर्लाबारी–६ मा रहेको यस विद्यालय २०२५ सालमा स्थापना भएको थियो । राधिकामा शिशु कक्षादेखि १२ कक्षासम्म र प्राबिधिक तर्फ कृषि बिषयको पढाई हुँदै आएको छ । यस विद्यालयमा २ हजार ४ सय ५५ जना विद्यार्थी अध्ययनरत रहेका छन् । विद्यालयमा ४ कक्षादेखि कक्षा १२ सम्म अंग्रेजी र नेपाली दुवै माध्यममा पठनपाठन हुँदै आएको छ । शिशु कक्षादेखि कक्षा ४ सम्म बेग्लै ब्लग छ ।
कक्षा ११ र १२ मा मानविकी, व्यवस्थापन, शिक्षा, बाली विज्ञान, कानुन र विज्ञानको पढाइ भइरहेको प्रधानाध्यापक कुमार पोखरेलले जानकारी दिनुभयो । २०६६ सालदेखि उच्च मावि तहको पढाइ सुरु भएको थियो । शिक्षा विभागले ल्याएको एक निर्वाचन क्षेत्र एक नमूना विद्यालय कार्यक्रममा यो विद्यालय पनि छनोट भएको थियो । यस विद्यालयमा कक्षा ११ र १२ मा ५ सय ५० जना विद्यार्थी अध्ययरत रहेका छन् ।
२०८० सालको एसईईमा उर्लाबारीका सामुदायिक विद्यालयको निराशजनक नतिजा आउँदा राधिकाले भने उत्कृष्ट नतिजा ल्याउन सफल भएको छ । एसईईमा ३.६ जिपिए भन्दा माथि २ जना, ३.२ जिपिए भन्दा माथि ८१ जना, २.८ जिपिए भन्दा माथि १ सय ५ जना, २ जिपिए भन्दा माथि ७ जना विद्यार्थीले ल्याएको अध्यक्ष लोलिम पोमुले जानकारी दिनुभयो । ३ सय ३६ जना विद्यार्थी एसईईमा सहभागी भएका थिए । जसमध्ये २ सय २९ जना सफल भएका छन् भने १ सय ६ जनाले मौका परीक्षा दिन पाएका छन् ।
व्यवस्थापन समितिका अध्यक्ष पोमुले अभिभावक, विद्यालय व्यवस्थापन समिति र शिक्षकहरुको लगातारको मिहिनेतका कारण विद्यालयको शैक्षिक सुधार भइरहेको बताउनुभयो । ‘अभिभावकको निरन्तर निगरानी, विद्यालय व्यवस्थापन समितिको खटनपटन एवम् जिम्मेवारी वोध तथा शिक्षकहरुमा आएको सेवा भावकै कारण विद्यालयको शैक्षिक सुधार सम्भव भएको हो’ अध्यक्ष पोमुले भन्नुभयो । विद्यालयमा शैक्षिक सुधारसँगै निजी विद्यालय छाडेर भर्ना हुन आउनेको संख्या बढेको उहाँको भनाइ छ ।
जिल्ला स्तरमा सञ्चालन हुने विद्यालयस्तरीय खेलकुद, सांस्कृतिक तथा साहित्यिक कार्यक्रमहरुमा समेत सो विद्यालयले राम्रो नतिजा ल्याउँदै आएको छ । कोशी प्रदेश सरकारको सहयोगमा १ जना विद्यालय नर्सको ब्यवस्थापन र विद्यालयले खेलकुदलाई प्रोत्साहन गर्न छुट्टै खेल शिक्षकको व्यवस्था गरेको छ । विद्यालयमा रहेको हेल्थ डेस्कले विद्यार्थीको सामान्य स्वास्थ्य परीक्षण, अत्यावश्यक औषधि वितरण तथा स्वास्थ्य सरसफाइ र महिनावारी भएको बेला सहयोग गर्ने गरिएको छ । विद्यालयमा अहिले सरकारी दरबन्दीमा रहेका ४२ सहित जम्मा ९२ जना शिक्षक कर्मचारी कार्यरत रहेका छन् ।